Оқиғалар Студент жалған ақпараты үшін 6 млн теңге көлемінде айыппұл төлеуі мүмкін
Өзінің ұялы телефонын сатқан жігіт, әпкесінің қаһарынан қорқып, телефонды ұрлап кетті деген
Фото:
kaliningradtoday.ru
102 каналындағы Өскемен ІІБ жедел орталығына Потанин көшесіндегі аулалардың бірінде туысын тонады деген ақпаратпен әйел хабарласады. Оқиға орнына патрульдік полиция мен жедел әрекет ету тобы шығады.
Зардап шеккен 19 жасар жігіт полиция қызметкерлеріне өзіне 4 жігіт жабылып, құны 15 000 теңге тұратын телефонын ұрлағанын айтады.
– 2 курс студенті бірнеше сағат көлемінде тәртіп сақшыларының «басын қатырған». Сондықтан полицейлер ешқандай із де, куәгер де таба алмаған. Нәтижесінде жігітке ақша керек болып, ол ұялы телефонын орталық базарда 7 мың теңгеге сатқаны белгілі болады. Және әпкесінің ашуынан қорқып, өтірік оқиғаны құрастырған, - деді ШҚО ІІД баспасөз қызметінде.
Жалған ақпараты үшін 19 жасар жігіт ҚР Қылмыстық кодексінің 419 бабына сәйкес қылмыстық жауапкершілікке тартылады. Бұл бапқа сәйкес қылмыскер 3 мың АЕК (6 363 000 теңге) айыппұл төлеп, 3 жылға бас бостандығынан айыруды қарастырады. Дегенмен, студентке жаза әлі қарастырылмады. Сатылған телефон қайтарылып алынды.