ШҚО-да бір центнерге жуық көксеркені заңсыз тасымалдамақ болған

Полиция мен табиғатты қорғау инспекторлары санитарлық бекеттердің бірінде браконьерлік фактісін анықтады, деп хабарлайды Устинка LIVE тілшісі.

ШҚО Орман шаруашылығы және жануарлар дүниесі инспекциясының баспасөз қызметінің мәліметінше, жақында тексерушілер бірнеше көлікті тоқтатып, 90 келі көксерке тапқан. Тұғыл ауылының жүргізушілерінде жүкке ешқандай құжаттар болған жоқ.

- Көксеркені заңсыз жолмен шығаруға тырысқан әрбір жүргізушіге мемлекетке келтірілген залалды 243 мың 770 теңге көлемінде төлеу керек болады, - деп хабарлады мекемеде. - Әкімшілік материалдар құқық бұзушылардың тұрғылықты жері бойынша сот органдарына жіберілді.

ШҚО Орман шаруашылығы және жануарлар дүниесі инспекциясында сатып алынған балық өнімдерін тасымалдау үшін жүкқұжат және ветеринариялық анықтама қажет екенін еске салады. Өздігінен балық аулау және оны тасымалдау кезінде арнайы рұқсат қажет.