Риддерде 82 жастағы зейнеткердің ақшасын ұрлап кеткен

Қазан айының аяғында Риддер қалалық полиция бөлімінің кезекші бөлімшесіне өзін біреулердің тонап кеткенін айтып, зейнеткер хабарласқан.

Көп ұзамай тәртіп сақшылары күдіктінің ізіне түсіп, тұтқындады. Ол бұрын істі болған 33 жастағы қала тұрғыны екен.

- Тергеу барысында бұл азаматтың оңай ақша табу мақсатында екінші деңгейлі банк маңын торуылдағаны анықталды. Банкте қомақты қаржы шешіп алған қария көзіне іліккен. Сөйтіп зейнеткердің үйіне дейін аңдып келіп, тонап кеткен, - деп мәлімдеді ШҚО ПД баспасөз қызметі. 

ҚР ҚК 191-бабы 3-бөлігі бойынша сотқа дейінгі тергеу басталды. Күдікті уақытша қамау изоляторына тоғытылды. Ақша тәркіленді. Тергеу жалғасуда.