Қылмыскер бір сағатта ұсталды

Оқиға кеше Жаңа Бұқтырма кентінде орын алған. Дүкен иесі дүкеніне ұры түскенін айтып, полиция қызметіне хабарласқан көрінеді.

- 32 жастағы дүкен иесінің шақыртуына байланысты тергеу тобы сағат 12-лер шамасында жеткен, - деп хабарлайды ШҚО ІІД баспасөз қызметі. - Зардап шегуші азаматша тәртіп сақшыларына тек ұрының бет-әлпетін шамалап сипаттап берген. Ал жарты сағат ішінде тергеушілер ұрының аты-жөнін анықтады.

Ол 33 жастағы жергілікті тұрғын болып шыққан. Ұры қолды қылған 20 мың теңгенің жартысын жұмсап үлгергенімен, тағы бір олжасы - 25 келі көкнәрді сатып үлгермеген.

- Жол-патрульдік полиция батальонының көмегімен күдікті азамат тұтқындалды. Ұрлық ісіне қатысты 191-баптың 2-бөлімі 1-тармағы бойынша сотқа дейінгі тергеу жүргізілуде, - деп мәлімдеді мекеме.

Жалпы, бірінші жарты жылдықта Жергілікті полиция қызметінің саптық бөлімшелер қызметкерлерінің қатысуымен облыста бір жарым мың қылмыс ашылған.