Әділет сержанты 8 мың теңгені жеп қойған

Бұл ақшаны ол түрмедегі азаматтан «демалыс» бергені үшін пара ретінде алған. Бұл жағдай Павлодар облысындағы колонияда орын алған. Бөлім басшысы – И. есімді сержант Г. есімді тұтқындағы азаматты 31 мамырдан 1 маусымға қараған түні босатып жіберген. Ол үшін пара алған. Артынша қоңырау шалып, азық-түлік түрінде тағы да пара беруін талап еткен. Колонияға қайтып келген тұтқын сержантқа сегіз мың теңге ақша мен азық-түлік салынған қап беріп жіберген. Ал осы параны алу барысында сержант қолға түскен. Ол параның көзін жою үшін ақшаны аузына салып үлгерген. Алайда ақша тәркіленді. Сот қаулысы бойынша бұрынғы сержантқа 530 400 теңге көлемінде айыппұл салынды. Сонымен қатар, лауазымынан айырылды. Мүлкі тәркіленіп, ол енді мемлекеттік қызметте жұмыс істей алмайды.