Оқиғалар Шенеуніктің кесірінен 18 жасар баласынан айрылған ана президенттен көмек сұрады
Тараз тұрғыны Қасым-Жомарт Тоқаевқа қалалық әкімдік қызметкері мінген көлік ұлын қағып кеткенін айтып бейнеүндеу жолдады
Әйелдің айтуынша, 23 қарашада оның 18 жастағы ұлын мемлекеттік қызметкер мінген көлік қағып кеткен. Жол-көлік оқиғасы салдарынан жігіт қаза тауып, оны қағып кеткен BMW жүргізушісі оқиға орнынан қашып кеткен. Қала тұрғыны адам өліміне әкелген жол апатына кінәлі әлі күнге дейін бостандықта жүргеніне шағымданып, оның әділ жазалануын талап етуде, деп хабарлайды nur.kz сайты.
- Президент мырза, құрметті Қазақстан халқы, сізден кінәлі адамның өз жазасын алып, істің жабылмауы үшін тиісті шаралар қабылдауға ықпал етуіңізді сұраймын, - деді Гауһар Қапарбекова.
Жамбыл облысының полиция департаменті жол апатын жасады деген күдікпен 28 жастағы жүргізуші ұсталғанын хабарлады. ҚР Қылмыстық кодексінің екі бабы бойынша: абайсызда адам өліміне әкеп соққан жол қозғалысы ережелерін бұзу, сондай-ақ жол-көлік оқиғасы болған жерді тастап кету бойынша сотқа дейінгі тергеу басталды. Ер адам уақытша ұстау изоляторына қамалды.
