Оқиғалар ШҚО-да екі бала скутермен жүк көлігінің астына түсті
Жол-көлік оқиғасы салдарынан скутер тізгініндегі оқушы әртүрлі дене жарақаты салдарынан жансақтау бөлімінде қайтыс болды, ал оның кәмелет жасқа толмаған құрбысы ауруханада
Қайғылы оқиға кеше күндіз Белоусов ауылында орын алған.
Полицейлердің сөзіне сүйенсек, кәмелет жасқа толмаған жүргізуші мен оның жолаушысы скутермен келе жатып газ жеткізетін жүк көлігінің астына түскен.
- 2006 жылғы ұл бала қайтыс болды, ал қыз бала әртүрлі дене жарақаттарымен ауруханада, - деді ШҚО ІІД баспасөз қызметінің басшысы Бақытжан Торғаев. - Аталған факті бойынша қылмыстық іс қозғалды. Бірқатар сараптамалар тағайындалды. Жол-көлік оқиғасының мән-жайы анықталуда.
Белоусов тұрғындарының айтуынша, ата-анасы баласына жуықта ғана скутер сыйлаған. Ал жолаушы қыз баланың апат салдарынан бұғанағы мен аяғы сынған.