«Казцинк» сумен тазалау кешенін жаңартпақ

Жөндеу жұмыстарынан кейін судағы мырыштың құрамы әлдеқайда азаймақ. Ал қалпына келтіру жұмыстарына Санкт-Петербург ғалымдары ойлап тапқан сорбент сығындысы қолданылмақ.

- Су кешеніне тартылған судың 98,5 пайызы қайта жіберіледі. Қалған бір жарым пайызы кешенде арнайы температураны ұстап тұру үшін қолданылады. Жаңа технологияны қолдану арқылы көлемі бір текше метр су құрамындағы мырыштың мөлшерін 0,01 миллиграмға дейін төмендейді, - дейді «Казцинк» ЖШС-нің бас экологы Қазтай Такеев.

Суды металдан тазалаудың бұл технологиясы екі жыл бойы тәжірибеден өткен. Технология өзінің тиімділігін көрсете алғандықтан, кәсіпорын жаңа әдісті өз кешенінде қолдануды ойлап отыр.

Мемлекеттік сараптамадан өткен соң, су кешенін жөндеу жұмыстары басталмақ. Жоспар бойынша бұл 2018 жылға сәйкес келіп отыр.

Айта кету керек, бұл «Казцинк» кәсіпорнының табиғатты қорғау мен экологиялық жағынан таза өндірісті қалыптастыру жолында жасаған жаңа жобаларының бірі. Бұған 2 млрд теңге жұмсалады.