Қазақстан Ұшақ бортында тәртіп бұзған қазақстандықтарға күш қолданылмақ
Ұшақ бортындағы азаматтардың қауіпсіздігін сақтау үшін құқықбұзушыны "байлап" тастауға болады
Бүгін Парламент Мәжілісінің жалпы отырысында ҚР Инвестициялар және даму бірінші вице-министрі Роман Скляр ұшақ бортындағы тәртіп бұзушылықтар тураы айтты, деп хабарлайды ҚазАқпарат.
- Әуе кемесінің бортындағы тәртіп біздің ережелермен регламенттелген. Кез келген тәртіп бұзушылық жол берілмейтін әрекет ретінде қарастырылады, - деді ол.
Оның атап өтуінше, ұшақ бортында қазақстандықтар тарапынан ереже бұзу оқиғалары жиі кездеспейді.
- Біздегі рейстер санының артуына қарамастан, өткен жылы әкімшілік жауапкершілікке қатысты екі-үш оқиға тіркелді. Сол кезде әуе кемесі бортында қоғамдық тәртіпті бұзғаны үшін бұл адамдар жауапкершілікке тартылды, - деді Роман Скляр.
Айта кетейік, бүгін Мәжілістің жалпы отырысында «Әуе кемелерінің бортында жасалатын қылмыстар және кейбір басқа да актілер туралы конвенцияны және Әуе кемелерінің бортында жасалатын қылмыстар және кейбір басқа да актілер туралы конвенцияны өзгертетін Хаттаманы ратификациялау туралы» заң жобасы мақұлданды.
