Семейге жазда ыстық су беріледі

Шаһар халқы 1997 жылдан бері жаздай ыстық су көрмей келе жатыр. Семей қаласының ЖЭС-1 қазандығындағы трубинаны жөндеу жұмыстары биыл маусым айына дейін аяқталады. Ал жөндеу жұмыстары сегіз жылға дейін созылған. 

- Қазандықты жөндеу жұмысына қажетті қаржы толықтай бөлінген. Трубина жөнделген соң, бүкіл қалаға жыл бойы ыстық су берілмек. Тек РК-3 қазандығына қосылған шағын аудандар ғана жазда ыстық сусыз қалуы мүмкін. Бұдан кейін қала ешқашан ыстық суға мұқтаж болмайды, - дейді облыс әкімі Даниал Ахметов.

Ал электр қуатын өндіруді 24 мегаватқа дейін толтыра отырып, «Шығысэнерготрейд» кәсіпорнынан жазғы кезде электр қуатын сатып алуды тоқтата тұрады. 

Облыс әкімі жөндеу жұмыстарын қадағалап отыру үшін ай сайын Семей қаласына іссапарға барып отыратындығын айтты. 

Сонымен қатар, Өскемен мен Семей қаласындағы аулаларды абаттандыру жұмыстары да биыл жалғасын таппақ.