Қазақстан Шығыс өңірінде 32 адам суға кеткен
Шомылу маусымы басталғаннан бері облыста 32 адам суға кетіп, қайтыс болған. Оның ішінде төртеуі - бала
Бұл былтырғы сәйкес кезеңмен салыстырғанда бір адамға аз.
Бұған дейін қаңтар-маусым айларында суға кетіп көз жұмғандардың саны 19 болған еді. Алайда бір айдың ішінде қаза тапқандардың саны 13-ке көбейген.
- Соңғы бір аптаның ішінде 10 адамның өмірі қыршынынан қиылды. Батып кеткен 21 адамның денесін құтқарушылар судан алып шықса, 11 адамның мәйітін тұрғындар алып шыққан, - дейді Шығыс өңірлік аэромобильді жедел-құтқару жасағының бас құтқарушысы Анатолий Рожков.
Суға батып кеткен 32 адамның үшеуі мас күйінде, 23-і жабдықталмаған орындарда суға шомылғанның, жүзе білмегеннің кесірінен қаза тапса, ата-аналардың жауапсыздығынан 4 баланың өмірі қыршын кеткен. Ал алты адам балық аулау кезінде, үш адам жазатайым оқиғадан қаза тапқан.
- Қауіпсіздік шаралары дұрыс жасалмағандықтан, адамдардың көбі жабдықталмаған орындарда суға кетіп көз жұмады. Құтқарушылар мұнарасы бар орындарда суға түсу керек, - дейді бас құтқарушы.
Анатолий Рожковтың сөзіне қарағанда, өзге республика аймақтарымен салыстырғанда Шығыс өңірінде су қоймалары көп, жағалау белдеулері ұзын. Ал мұндай өлшемді игеруге құтқарушылардың саны жетпейді.
- Облысымызда 2121 су қоймасы бар. Ал су жағалаулары мен қоймаларын күзету үшін 120 құтқарушы аздық етеді. Жергілікті атқарушы органдар Алакөл жағалауларына алты-ақ адамды құтқарушы етіп қойған. Ал жағалаудың ұзындығы - 9 шақырым. Әлемдік стандарт бойынша әрбір 200 метр сайын бір құтқарушы барлау жүргізуі керек, - дейді Анатолий Николаевич.
Авторы: Қымбат Слямбеков