Қазақстан Қабанбай батыр-Жалаңашкөл жолы жөнделмек
Биыл Үржар ауданындағы Қабанбай батыр ауылы мен Жалаңашкөл аралығында автокөлік жолы жөнделетін болды
Бұл жолдың жөнделмегеніне 30 жылдай уақыт болған еді.
- Біз биыл Қабанбай батыр ауылы мен Достық бекеті аралығындағы жолға орташа жөндеу жұмыстарын жүргізуді жоспарлап отырмыз. Бұл - маңызды жұмыс. Нәтижесінде Алматыдан келген қонақтарымыз Үржар ауданындағы шипажайларға келе алады, - дейді облыс әкімі Даниал Ахметов.
Аймақ басшысының сөзіне қарағанда, жөнделетін жолдардың әлеуметтік маңызы мен мақсаты айқын болуы тиіс. Әсіресе, халықтың жүріп-тұруына қажетті жолдар жөнделуі тиіс. Былтырғы жылы 40 жыл бойы жөндеу көрмеген Ақсуат-Аягөз бағытындағы жол жөнделіп, халықтың пайдалануына берілген болатын.
- Біз қырық жыл бойы жөнделмеген жолды жөндедік. Халық басында сенбеді. Алайда жолды салған соң, олардың сенімдерді өзгерді. Ұзақ уақыт жөндеу көрмеген жолдарды да жөндеуге болатындығын дәлелдедік. Ой салдық, - дейді Даниал Ахметов.
Егер Қабанбай ауылы мен Жалаңашкөл аралығындағы жол жөнделетін болса, алматылық қонақтар емдік орындарға небәрі 40 минутта жететін көрінеді. Жалаңашкөл суы емдік қасиеті жоғары шипалы көл саналады.
Авторы: Қымбат Слямбеков