Әскери қызметкерлер жалақысы өседі

Бұл туралы ҚР Президенті Нұрсұлтан Назарбаев Қазақстан Қарулы Күштеріне 25 жыл толуына орай мемлекеттік марапаттар мен погондарды табыс ету рәсімі барысында хабарлады. 

- Кез келген тәуелсіз мемлекетте Қарулы Күштер мен құқыққорғау органдары болуы керек екенін білеміз. Сондықтан қиындықтарға қарамастан мемлекет әскери қызметкерлерінің лайықты материалды-техникалық базасын нығайтуға бар күшін салады, - деді Нұрсұлтан Назарбаев.

Ағымдағы жылдың шілде айынан бастап ҚР Қорғаныс министрлігі, ҰҚК, Ұлттық ұлан мен Мемлекеттік күзет әскери қызметкерлерінің жалақысы 25 пайызға өседі.

- Тәуелсіздіктің 25 жылдығын, Қарулы Күштердің 25 жылдығына байланысты Қорғаныс министрлігінің, ҰҚК, Ұлттық ұлан және Мемлекеттік күзет қызметінің қызметтік еңбекақысын 1 шілдеден бастап 25 пайызға өсіру туралы шешім қабылдадым, - деді Елбасы.
Айтулы күнде мемлекеттік сыйлықтар мен жаңа лауазымға ие болған әскери қызметкерлер үшін бұл жаңалық екі есе қуанышқа толы екені анық.