Қазақстан Еңбек күні: Мемлекет басшысы үздіктердң мемлекеттік деңгейде ұлықтауды ұсынды
ҚР Президенті Қасым-Жомарт Тоқаев Ұлттық құрылтайда ерінбей еңбек еткен жан өз ісінің майталманы атанатынын айтты
Елімізде түрлі кәсіби мерекелер болғанымен, олардың көбі қажетті деңгейде атап өтілмей қалады.
- Қажетсіз мамандық болмайды, біліксіз маман болады. Ерінбей еңбек еткен жан өз ісінің майталманы атанады. Ал кәсібін толық меңгерген адам қашанда сұранысқа ие болады. Біз еңбек адамының мәртебесін көтеруге баса мән береміз. Елімізде түрлі саланың кәсіби мерекесі бар. Көбінесе мұндай мейрамдар назардан тыс қалып жатады, - дейді мемлекет басшысы. - Менің ойымша, «Еңбек күніне» орай ең үздік мамандарды мемлекеттік деңгейде ұлықтаған жөн. Бұл қадам қоғамда еңбек культін орнықтыруға жол ашады. Шын мәнінде, қандай жұмыс істеп жүргенің емес, оны қалай істеп жүргенің әлдеқайда маңызды. Министр немесе әкім болсын, құрылысшы, дәрігер, мұғалім болсын, ең бастысы, әркім өз міндетін адал атқаруы керек. Нанын адал еңбекпен табуы керек.
ҚР Президенті Қазақстанның Еңбек Ері Вадим Басин еңбек адамын насихаттау туралы ойын тілге тиек етті.
- Нағыз еңбек адамы дегеніміз кім? Бұл, ең алдымен, өзіне жүктелген міндетті орындау үшін барын салып еңбек ететін білікті маман. Нағыз еңбек адамы бұл – істің адамы, яғни әр ісіне, әр қадамына жауапкершілікпен қарайтын адал азамат. Ал жауапсыздықтың салдары неге апарып соқтыратыны кешегі өрт кезінде айқын көрінді. Осындай келеңсіз жағдайлар тек орман шаруашылығында емес, басқа да салада бар, - деді Қасым-Жомарт Тоқаев.
