Қазақстан Тоқаев теледебатқа қатыспайды
Қазақстан президенті Қасым-Жомарт Тоқаев 29 мамырда "Хабар" арнасында өтетін кандидаттар дебатына қатыспайды
Бұл туралы Тоқаевтың кеңесшісі Ерлан Қарин қазақстандық ақпарат агенттіктеріне айтты, деп хабарлайды Азаттық радиосы.
Қариннің сөзінше, "Тоқаев үгіт-насихат науқанынан өзін барынша шектеп, президенттік қызметіне көп көңіл бөліп жүр. Оның үгіт-насихат жұмыстарын сайлауалды штабы мен сенімді өкілдері жүргізіп жатыр".
- Президент басқа кандидаттарда көп мүмкіндік болуы керек деп санайды. Басқа кандидаттар да өз ұстанымдарын кеңінен насихаттап, халыққа танылса дейді. Ол әділ сайлау өткізуге уәде берген. Бұл - оның негізгі ұстанымы, - деді ол.
Қариннің сөзінше, Тоқаев сайлауалды штабына теледебатқа бір өкіл жіберуді тапсырған. Бірақ президенттің кеңесшісі дебатқа сайлауалды штабының өкілдері қатысу-қатыспауын ашып айтпады.
