ҚР Денсаулық сақтау министрлігі азық-түлік өнімдерін түрлі түспен таңбалауды ұсынды

Алматыда "Тамақ өнімдерінің қауіпсіздігі және таңбалануы" тақырыбында халықаралық форум өтті, деп хабарлайды ҚазАқпарат тілшісі.

Жаңа таңбалау ережелері тұтынушылардың  өнім таңдағанда толық ақпарат алуына мүмкіндік береді.

- Қазір бізде көптеген белгілер бар, олар ақпаратты тұтынушыға толық бермейді. Ал әртүрлі қаріптердің салдарынан қаптама сыртына өнімнің құрамы туралы ақпараттар толық сыймай жатады. Тұтынушы қаптамадағы кішкентай әріптерді тек үлкейткіш әйнекпен көре алады. Бұл ыңғайсыз. Қауіпсіздік үшін пайдалы ақпараттар туралы тұтынушыға хабарлауымыз керек, - деді ҚР Денсаулық сақтау министрлігінің Қоғамдық денсаулықты сақтау комитетінің төрағасы Жандарбек Бекшин.

Осыған байланысты, белгілі бір заттардың құрамына қарай - қызыл, сары және жасыл сияқты әр түрлі түспен белгілеу ұсынылды.

Бұл өнімнің зиян немесе пайдасы туралы емес, қант, тұз, консерванттар сияқты заттардың құрамы туралы дерек көзі болады.

Ал ет, көкөніс, жеміс-жидек секілді шикізаттар белгіленбейді.