Қазақстан Қазақстандықтарға ипотекалық сертификаттар беріледі
"7-20-25" мемлекеттік бағдарламасы бойынша алғашқы жарнаға бір миллион теңге елдің бәріне бірдей берілмейді
Бұл жайында бүгін "Баспана" ипотекалық ұйымының басқарма төрағасы Қайрат Алтынбеков айтты, деп хабарлайды Sputnik Қазақстан.
- Осы тапсырма аясындағы жоспарымыз бойынша, әкімдіктер мен жергілікті атқарушы органдар сертификаттарды, президент айтқандай, әлеуметтік және бюджеттік сала қызметкерлеріне – ұстаздар, дәрігерлер, полицейлер және тағы басқаларына беретін болады, – дейді Алтынбеков.
Ипотекалық сертификаттар екі схема бойынша беріледі. Кей қазақстандықтар оны тегін алады.
- Ипотекалық сертификаттарды берудің екі нұсқасы бар: қайтарымсыз әлеуметтік көмек ретінде ұсынылады немесе ұзақмерзімді пайызсыз несие ретінде беріледі, – дейді Қайрат Алтынбеков.
Қайтарымсыз әлеуметтік көмек қалалық мәслихаттар көмегімен үлестірілетін болса, пайызсыз несиенің ережелері туралы әлі хабарланған жоқ. Алтынбековтың айтуынша, жобаның бүге-шігесі мен орындалуына әкімдіктер жауапты, сертификаттарды беру ережелері мен тәртібін де солар бекітеді.
