Қазақстан Ұлттық Банкте базалық мөлшерлеменің көтерілгені туралы айтылды
Қазақстан Республикасы Ұлттық Банкінің Ақша-кредит саясаты жөніндегі комитеті базалық мөлшерлемені +/-1,00 п.т. пайыздық дәлізімен 13,5% деңгейінде белгілеу туралы кезектен тыс шешім қабылдады
Бұл туралы Ұлттық банктің баспасөз қызметі хабарлады. Шешім 2022 жылғы 24 ақпанда күшіне енеді. Баспасөз хабарламасы сағат 13:00-де жарияланады.
Бұл шешім "Ұлттық банк пен Үкіметтің дағдарысқа қарсы шараларының теріс сценарийі мен жоспарлары аясында қаралған геосаяси ахуалдың елеулі нашарлауы кезінде сыртқы сектор тарапынан тәуекелдерді іске асыру аясында баға тұрақтылығын қолдау қажеттілігіне" негізделген.
Ұлттық банктің инфляциялық таргеттеу шеңберінде жүзеге асырылып жатқан ақша-несие саясаты ел экономикасына сыртқы күйзеліс салдарларының таралуын болдырмауға, макроэкономикалық тұрақтылықты қамтамасыз етуге және теңге активтерін қорғауға бағытталған. Екінші деңгейдегі банктер ақша-кредит саясаты құралдарының шеңберінде қажетті өтімділікпен қамтамасыз етіледі.
Ұлттық банк қаржы жүйесінің тұрақтылығын қамтамасыз ету үшін шамадан тыс құбылмалылық жағдайында валюталық интервенциялар жүргізу құқығын сақтай отырып, теңгенің еркін құбылмалы айырбас бағамы режимін сақтауды жалғастырады. Бұл ретте теңгенің икемді айырбас бағамы алтын-валюта активтерінің сақталуын қамтамасыз етеді, оның маңыздылығы сыртқы сектордан келетін тәуекелдерді іске асыру аясында артты, - делінген хабарламада.
Ұлттық банк 24 ақпанда 104 миллион долларға интервенция өткізді.
Үкімет Ұлттық банкпен бірлесіп іске асыратын халықтың теңгелік депозиттерін қолдау жөніндегі шаралар туралы қосымша хабарланатын болады. Ұлттық банк ішкі ақша және валюта нарықтарындағы, сондай-ақ әлемдік шикізат нарықтарындағы ахуалға үнемі мониторинг жүргізіп отырады және қажет болған жағдайда қаржылық тұрақтылықты қамтамасыз ету бойынша қосымша шаралар қабылдайды, - деп толықтырды ҰБ.
