Қазақстан Қазақстанда астық жиналмай жатыр
Жауын-шашынның көбею кесірінен диқандар дер кезінде астық жинай алмай отыр
Қазақстандағы астықтың 70%-ы жиналып болған, алайда қалған астықты жинауға ауа райы кедергі келтіріп отыр, деп хабарлайды Zakon.kz.
Жауын-шашынның кесірінен астықтың жиналмай қалуы не егіннің сапасы нашарлауы мүмкін деген болжамды Ақмола өңірінде ұзақ жыл басшылық қызметте болған депутат Альберт Рау мәлімдеп отыр. Алайда елдің Ауыл шаруашылық министрлігі депутаттың бұл болжамымен келіспейді.
- Егер бидай бағасын көтермесек, онда егін шаруашылығынан пайда түспейді не шығынға ұшырайды, - дейді ҚР Мәжіліс депутаты Альберт Рау.
Жауын-шашынның кесірінен астықтың біршама бөлігі су болып қалды. Енді диқандар бидайды кептіру үшін премьер-министрден жанар-жағармайға қосымша қаржы сұрауға мәжбүр.
Мемлекет диқандарға арнап 50 мың тонна дизель отынын төмен бағамен беріп отыр. Ал синоптиктердің болжауынша, алда тек бір апта ғана күн жылы болмақ. Демек, шығын бұдан да көп болуы мүмкін.
