Қазақстан Картоптың қымбаттауына алыпсатарлар кінәлі – Мырзахметов
Биыл Өзбекстанға картоп экспортталғандықтан, баға қымбаттап кеткен.
Дегенмен, ҚР Ауыл шаруашылық министрі картоптың қымбаттауының нақты себептері жоқ деп отыр. Оның сөзіне қарағанда, биыл жиналған картоптың көлемі былтырғымен салыстырғанда көп.
- Қазіргі уақытта 3,5 млн тонна картоп жиналды. Бұл былтырғымен салыстырғанда 150 мың тоннаға артық, - дейді Асқар Мырзахметов.
Қыркүйек айында Өзбекстанға 800 тонна картоп экспортталған. Сол кезде картоп бағасы біраз өскен болатын. Алайда одан бері ешқандай экспорт болған емес. Картоптың көтерме саудадағы бағасы 75-80 теңге. Бірақ бөлшек саудада оның бағасы қасақана көбейтіліп отыр. Министрдің ойынша, бұған алып сатарлар кінәлі.
- Картоп бағасының қымбаттауына алып сатарлар кінәлі деп ойлаймыз. Бұған шара қолданылады. Заңнамада шектік бағаны қою мен оны орындау жөнінде арнайы тармақтар бар. Жергілікті атқарушы органдар картоп бағасын тексере отырып, негізсіз қымбаттатылғанын анықтаса, Ұлттық экономика министрлігіне жолдаса болады, - дейді министр.
