Қазақстан Су тасқынымен күреске атсалысқандар марапатталды
Биыл көктемде бұрын елде ешқашан болмаған ең жойқын табиғи апат болып, бірнеше елді мекенді тасқын су басты
Оған күштік құрылымдардың 63 мыңнан астам қызметкері жұмылдырылды, деп хабарлайды Устинка LIVE тілшісі Ақорда ақпаратына сүйеніп.
Қазақстанның 10 аймағында төтенше жағдай жарияланды. Жалпы, ел көлемінде 19 мыңнан астам тұрғын үйді су басты.
Ақордада су тасқынымен күреске белсене атсалысқан азаматтарды Мемлекет басшысы салтанатты түрде марапаттады.
Сын сағатта еліміз ырысты ынтымағын танытты. Біз табиғи апат кезінде жұрт болып жұмылдық. Біртұтас ел екенімізді көрсеттік. Құтқарушылар, әскерилер, ішкі істер органдары мен әкімдік қызметкерлері тәулік бойы жұмыс істеді. Олар Отан алдындағы парызын мінсіз атқарды. Бір сөзбен, антқа адал болды, – деді Мемлекет басшысы.
Қасым-Жомарт Тоқаев топан сумен күреске күштік құрылымдардың 63 мыңнан астам қызметкері атсалысқанына назар аударды. Құтқару операциясы барысында 120 мыңнан астам адам, оның ішінде 40 мың бала қауіпсіз жерге көшірілді.
Бұл – құтқарушылар мен ұшқыштардың қажырлы еңбегінің нәтижесі. Әбіш Кекілбаев "Елін сүйген азаматқа ең үлкен қайғы – өз халқының тағдырынан тыс қалу" деп айтқан. Ұлттық еріктілер желісі табиғи апат болған сәттен бастап ерекше белсенді болды. 50 мыңнан астам волонтер көмек керуендерін ұйымдастырды. Олар апат аймақтарына азық-түлік және басқа да қажетті заттарды жеткізуге атсалысты. Қазақстан халқы Ассамблеясының "Жүректен жүрекке" акциясы ортақ іске мол септігін тигізді, – деді Президент.
