Қазақстан Жалған шетел валютасын өткізу фактілері жиілеп кеткен
Екі жыл ішінде тәркіленген жалған банкноттардың жалпы сомасы 55 млн теңгеден асады
Статистикалық мәліметтерге сәйкес, 2024 жылдың басынан бері ел аумағында 13 жалған ақша жасау фактісі тіркелген, деп хабарлайды Устинка LIVE тілшісі ҚР Қаржылық мониторинг агенттігі ақпаратына сүйеніп.
Агенттік мамандары демалыс маусымы қарсаңында валюта айырбастау кезінде, әсіресе шетелге шыққанда, қырағылық танытуды ескертеді.
Жалған ақша жасаушылардың құрбаны болмас үшін және қылмыстық қудалау орбитасына ілінбеу мақсатында жақсы бағам бойынша айырбастауды ұсынса да бейтаныс адамдарға ақша айырбастамаңыз және валютаны "делдалдардан" сатып алмаңыз, - деп ескертеді агенттік мамандары. - Сауда-саттық жасау кезінде мұқият болуға және банкоматтан ақша алғанда, чектерін сақтауға кеңес береміз.
Қызметі қолма-қол ақша айналымымен байланысты азаматтар мен қаржылық мониторинг субъектілерін (ЕДБ, айырбастау пункттері, ломбардтар және т.б.) жалған банкноттар табылған жағдайда дереу ҚМА-ның аумақтық департаменттеріне (байланыс телефондары төменде келтірілген) жүгіну қажет.
Жалған ақша жасау, сақтау, тасымалдау немесе өткізуге байланысты істерді тергеп-тексеру тек қана ҚР Қаржылық мониторинг агенттігіннің және оның аумақтық департаменттерінің құзыретіне жатады.
Статистикалық мәліметтерге сәйкес, 2024 жылдың басынан бері ел аумағында 13 жалған ақша жасау фактісі тіркелген (2023 жылы – 45 қылмыстық іс, 2022 жылы – 44 қылмыстық іс).
Тек 2023 жылы және 2024 жылдың басынан бері Қазақстан аумағында айналымнан 1 763 жалған банкнот тәркіленді, оның ішінде ұлттық валютада 1 378 200 теңге сомасына 384 купюра, АҚШ долларында сомасы 120 050 АҚШ долларына 1 342 купюра, еурода сомасы 17 500 еуроға 35 купюра, ресей рублімен - 10 000 рубль сомасына 2 купюра анықталды, - деп хабарлады агенттіктегілер. - Тәркіленген жалған банкноттардың жалпы сомасы 55 млн теңгеден асады.
Жалған банкноттары мен монеталарын не шетел валютасын өткізу мақсатында дайындап, сақтағандардың мүлкі тәркіленіп, 5 жылдан 12 жылға дейінгі мерзімге (ауырлығына қарай) бас бостандығынан айырылатынын айта кеткен жөн.