Қазақстан Қазақ күресі вариативті пән ретінде 28 мектепте оқытылады
Астана мектептерінде 2021 жылдан бері қолға алынған пилоттық жоба жақсы нәтиже көрсеткен
Сол себепті енді 30 шақты мектепте қазақ күресі вариативті пән ретінде енгізілетін болады, деп хабарлайды Устинка LIVE тілшісі ҚР Мәдениет және спорт министрлігінің ақпаратына сүйеніп.
Мәдениет және спорт министрлігінің қолдауымен Qazaq kuresi Ассоциациясы қазақ күресін дамытуға және оны мектеп бағдарламасына енгізу бағытында кешенді жұмыс жүргізіп жатыр. Ұлттық спорт түрін пән ретінде оқыту ең алғаш 2021 жылы Астана қаласындағы мектептерде апробациядан өтті. Сондай-ақ, Назарбаев Зияткерлік мектептерімен бірге 2020-2021 оқу жылына арналған қазақ күресін дамыту жөніндегі іс-шаралардың бірлескен жоспары әзірленіп, жүзеге асырылды.
Пилоттық жоба тиімділігімен танылып, жақсы нәтиже көрсетті. Осының арқасында бүгінде Астананың 28 мектебінде қазақ күресі вариативті пән ретінде оқытылады.
Айта кету керек, елімізде қазақ күресімен жүйелі түрде айналысатын отандастарымыздың саны 159 мыңға жетті. Бүгінгі таңда 4427 қазақ күресі үйірмесі жұмыс істейді.
Қазақ күресі әсіресе аудандарда, ауылдарда қарқынды дамып жатыр. Себебі бұл шығыны аз, көпшілік үшін қолжетімді спорт түрі саналады. Бірақ біз қала жастарын да ұлттық спорт түріне баулу мақсатында жұмыс істеп жатырмыз. Қазақ күресіне тек күрес түрі ғана емес, жастарымыздың жігіттік болмысын қалыптастыратын тәрбие құралы ретінде қарау керек. Осы орайда ұлттық спорт түрін мектеп бағдарламасына енгізудің маңызы өте жоғары, - деді ҚР МСМ Спорт және дене шынықтыру істері комитетінің төрағасы Ербол Мырзабосынов.