Қазақстан Кенесары ханның Құран кітабы муфтиятқа табысталды
Марал ишанның Кенесары ханға сыйлаған Құран кітабы табылып, елге қайтарылды
Бүгін Президенттің тікелей тапсырмасы бойынша мемлекеттік кеңесші Ерлан Қарин Кенесары ханның Құранын Қазақстан мұсылмандары діни басқармасына табыстады, деп хабарлайды Устинка LIVE.
Кенесары ханның Құраны табылып, елге қайтарылғаны туралы Мемлекет басшысы Түркістанда өткен Ұлттық құрылтайдың екінші отырысында айтқан болатын.
Мемлекеттік кеңесші Құранды отандық және шетелдік жоғары білікті, тәжірибелі мамандар толықтай зерттегенін, бірауыздан оның Кенесары ханға тиесілі екенін анықтағанын айтты. Сонымен қатар, ол Құранның жан-жақты сипаттамасын баяндап, ерекшеліктерін жеткізді, - делінген ҚМДБ ақпаратында.
Ғалымдар Құранның бұл нұсқасы қазақ халқының тарихи жәдігері екенін растап, оның тарихи және музейлік құндылығы өте жоғары деп бағалап отыр.
Салтанатты рәсімге қоғам қайраткерлері, зиялы қауым өкілдері, Ұлттық құрылтайдың мүшелері мен дін қызметкерлері қатысты.