Қазақстан Қазақстан боксшылары әлем чемпионатында 4 алтынды қанжығалады
Кеше Өзбекстан астанасы Ташкентте бокстан ерлер арасындағы XXII әлем чемпионаты өтті
Қазақстан құрамасы бұл бәсекеде 4 алтын, 1 күміс медальді қоржынға салып, жалпы есепте 2-орын алды, деп хабарлайды Устинка LIVE ҚР МСМ Спорт және дене шынықтыру істері комитеті жанындағы Спортты дамыту дирекциясы ақпаратына сүйеніп.
Жалпы Қазақстан 1993 жылдан бері егемен ел ретінде осымен 16 рет әлем чемпионатына былғары қолғап шеберлерін жіберді. Қазір еншімізде 18 алтын, 16 күміс, 22 қола жүлде бар. Осының арқасында жалпы ӘЧ тарихындағы медаль есебінде Қазақстан АҚШ-ты басып озып, 3-орынға көтерілді. Ұлттық құрама осыған дейін тек 2013 жылы Алматыда өткен дүниежүзі бәсекесінде 4 алтынға ие болған.
Тағы айта кетейік, әлем чемпиондары Халықаралық бокс қауымдастығынан (IBA) 200 мың АҚШ долларынан алды. Күміс жүлдегерлерге 100 мың, қола жүлдегерлердің әрқайсысына 50 мың АҚШ доллары берілді. Биылғы доданың жалпы жүлде қоры – 5,2 млн.
Бүгін Мемлекет басшысының өзі чемпионат жеңімпаздарын құттықтады.
Бокстан әлем чемпионатының финалдық жекпе-жектерін зор қызығушылықпен тамашаладым. Жеңіске деген ерік-жігер мен шынайы патриотизмнің жарқын үлгісін көрсеткен боксшыларымыз Санжар Тәшкенбай, Махмұд Сабырхан, Асланбек Шымбергенов және Нұрбек Оралбайды шын жүректен құттықтаймын! Қазақтың төрт жігіті – әлем чемпионы! – деп жазды Президент Twitter-де.