Қазақстан ҚР-да екі айға балық аулауға тыйым салынды
5 сәуір мен 5 маусым аралығында уылдырық шашу кезеңінде балық аулауға болмайды
Бұл туралы Ішкі істер министрлігі мәлімдеді, деп хабарлайды Устинка LIVE тілшісі BAQ.KZ-ке сілтеме жасап.
Уылдырық шашу кезеңінде балықтар мен өзге де су жануарларының биоалуандығын сақтау үшін Экология және табиғи ресурстар министрлігі 5 сәуір мен 5 маусым аралығында "Уылдырық шашу" акциясын өткізеді. Ведомство республиканың әр өңірінде өңірлік ерекшеліктерді ескере отырып, балық аулауға тыйым салу мерзімін енгізеді, - деп атап өтті ведомство өкілі.
Мүдделі мемлекеттік органдардың қызметкерлері осы кезеңде заңсыз балық аулау немесе өткізу, балық және балық өнімдерін тасуды бақылауға алады.
Заңды бұзғандарға Әкімшілік кодекстің 383-бабына сәйкес әкімшілік жауапкершілік қарастырылған. Яғни, 10-нан 40 АЕК-ке дейін айыппұл және Қылмыстық кодекстің 335-бабына сәйкес 3 жылға дейін бас бостандығынан айыру түрінде қылмыстық жауапкершілік қарастырылған, - деді ведомство өкілі Шұғыла Тұрлыбек.