Қазақстан ЖСН алу мен азаматтық алудың айырмашылығы неде?
Қазіргі уақытта елімізге көршілес мемлекеттен жаппай қоныс аудару фактілері жиілеп кеткендіктен осы сұрақ көптің көкейінде
Шет елден келгендер ЖСН алыпты дегенді естісе, көбі азаматтық берілді деп ойлайды. Екеуінің ара-жігін ажыратайық... Бұл айырмашылықты Халыққа қызмет көрсету орталығының мамандары түсіндірді.
Бізге "ЖСН алу мен азаматтық алудың айырмашылығы қандай?" деген сұрақ жиі қойылады. Жеке сәйкестендіру нөмірі - ҚР азаматтарына туған кезде берілетін 12 цифрдан тұратын бірегей сандар комбинациясы, - деп хабарлады ШҚО бойынша "Азаматтарға арналған үкіметтің" баспасөз қызметі. - Шетелдік азаматтар ЖСН алу үшін ХҚО-ға жүгіне алады. Бұл ретте кез келген шет мемлекет азаматы ЖСН-ды кәсіпкерлік қызметпен айналысу үшін және қаржылық операцияларды орындау үшін ала алады. ЖСН алу мен азаматтық алу - екеуі екі бөлек дүние.
Ал Қазақстан Республикасы азаматтығын ҚР аумағында кемінде 5 жыл тұрақты тұратын адамдар; елде кемінде үш жыл тұратын ҚР азаматымен некеге тұрған адамдар; сондай-ақ, Қазақстан аумағында тұратын жақын туыстары бар адамдар ала алады.
Айта кетейік, Қазақстан аумағында тұрақты тұратын қандастар, Қазақстанның жоғары оқу орындарында оқитын этникалық қазақтар азаматтықты жеңілдетілген тәртіппен алады.
