Қазақстан Президенті оқушыларды құтқару кезінде қаза тапқан мұғалімді марапаттады

Қазақстан Президентінің баспасөз хатшысы Берік Уәли Мемлекет басшысының 29 мамырда Алматы облысындағы Шарын шатқалында болған қайғылы оқиға туралы хабарды зор күйзеліспен қабыл алғандығын айтты, деп хабарлайды Устинка LIVE тілшісі. Қасым-Жомарт Тоқаев қаза болғандардың отбасыларына көңіл айтып, зардап шеккендердің тезірек сауығып кетуіне тілектестік білдірді.

- Оқушыларды құтқару үшін өзін құрбан еткен Мерей Нұрғазыұлы бүкіл өмірін балаларды оқытуға арнаған білікті маман болды. Ол шәкірттерінің сүйікті тәрбиешісі болды. Апат кезінде жас мұғалім батылдық танытып, оқушыларға көмектесуге асықты. Өмірі 26 жасында үзілген Нұрғазыұлы туралы жарқын естелік біздің жүрегімізде мәңгі сақталады, - делінген жеделхатта.

Адам өмірін сақтап қалуға байланысты төтенше жағдайда көрсеткен ерлігі мен жанқиярлығы үшін Қазақстан Президентінің Жарлығымен Ибрагимов Мерей Нұрғазыұлы "Ерлігі үшін" медалімен марапатталды.