Қазақстан Мемлекет басшысы қазақстандықтарды Наурыз мейрамымен құттықтады
Әз-Наурыз - сан ғасырлық тарихы бар, ұлттық рух пен мәдени құндылықтарды ұлықтайтын ұлы мереке, табиғат пен адамзат қайта түлейтін жыл басы
Ұлыстың ұлы күні Мемлекет басшысы Қасым-Жомарт Тоқаев Түркістан облысының жұртшылығымен кездесті, деп хабарлайды Устинка LIVE тілшісі.
Баршаңызды Ұлыстың ұлы күні – әз-Наурыз мейрамымен шын жүректен құттықтаймын! Әз-Наурыз – тазару, жаңару уақыты. Тазалық – мән-мағынасы кең ұғым. Бұл – ең алдымен, ой тазалығы, сана мен ниет тазалығы деген сөз. Осыдан екі жыл бұрын елімізде "Таза Қазақстан" жалпыұлттық акциясы бастау алды. Ауқымды жоба халықтың, әсіресе, жастардың жаппай қолдауына ие болды. Азаматтарымыз тазалықты құр сөзбен емес, нақты ісімен көрсетуде. Ұқыптылық, жинақылық, тиянақтылық қасиеттері ұлтымыздың жаңа сапасына айнала бастады, - деп атап өтті мемлекет басшысы.
"Таза Қазақстан" бастамасы – жай ғана кезекті саяси науқан немесе үгіт-насихат емес, бұл – мемлекетіміздің мызғымас идеологиясы. Президент осы игі іспен жыл бойы айналысуымыз керектігін, ұлт болмысының ажырамас бөлігі болуға тиіс екенін атап өтті. Әсіресе, Ұлыстың ұлы күні тазалық философиясын кеңінен дәріптеу маңызды.