Қазақстан Мың түйелі керуен Гиннес рекордтар кітабына енді
Былтыр қыркүйек айында Іле ауданына қарасты Құрты ауылында мың жалқы өркешті түйеден тұратын керуен бір шақырым жүріп өткен
Бұл ресми түрде әлемдегі ең үлкен керуен ретінде Гиннес рекордтар кітабына енді, деп хабарлайды Устинка LIVE тілшісі.
Бұл керуеннің ерекшелігі – мың түйенің иесі бір адам. Керуеннің бастамашысы әрі иесі - "Дәулет-Бекет" ЖШС директоры Сыдық Дәулетов.
Әлемдік жетістік туралы сертификатты Гиннес рекордтар кітабының өкілі Ричард-Уильям Стэннинг табыстады.
Бұл - ерекше жағдай. Басқа елдерде мұндай шараларда жануарлар әртүрлі иелерден жиналады - бірінде төрт түйе, екіншісінде екі түйе болады. Ал мұнда бүкіл керуен бір ғана адамның иелігінде - бұл шын мәнінде рекордты ерекшелейді. Қазақстан маған үлкен әсер қалдырды, енді мұнда тек жұмыс бабымен емес, турист ретінде де қайтып келгім келеді, - деді Ричард-Уильям Стэннинг.
Сыдық Дәулетов жобаға дайындық шамамен жарты жылға созылғанын айтты.
Түйелер еркіндікке үйренген, оларды бір жерге жинау оңай болған жоқ. Бірақ мақсат пен сенім болса, мүмкін емес нәрсе жоқ екенін дәлелдедік. Алдағы уақытта шұбат фестивалін өткізуді жоспарлап отырмыз - халқымызға салт-дәстүрімізді жаңғыртатын осындай шаралар қажет, - дейді шаруа қожалығының иесі.
Алматы облысының әкімі Марат Сұлтанғазиев әлемдік рекордтың расталуы тек өңір үшін емес, бүкіл ел үшін маңызды оқиға екенін атап өтті.
Рекордтың расталуы - бұл біздің мәдени мұрамыз бен ұлттық рухымыздың мойындалуы. Мың түйеден құралған керуен халықты біріктіріп, қазақ халқының дәстүріне деген құрметтің символына айналды, - дейді облыс әкімі.