Қазақстан Түркістан облысында 74 отбасы алаяқтықпен әлеуметтік төлем алып жүрген
Осылайша мемлекеттік бюджетке 13 млн теңгеге жуық шығын келтірген
Түркістан облысының прокуратурасы қаражатты қайтарту және кінәлілерді жауапқа тарту бойынша жұмыстар жүргізуде, деп хабарлайды Устинка LIVE тілшісі.
Жетісай ауданында атаулы әлеуметтік көмек тағайындау үшін жергілікті атқарушы органмен құрылған комиссия "атаулы әлеуметтік көмекке мұқтаж емес" деген қорытынды бергеніне қарамастан 18 отбасыға негізсіз 3,1 млн теңге төлем жүргізілген, - деп мәлімдеді Түркістан облысының прокуратурасы. - Ал Сарыағаш ауданының Қапланбек ауылдық округінде учаскелік комиссия хатшысы мен ауылдық округ әкімінің орынбасары комиссия мүшелерінің атынан қол қойып, 56 өтініш бойынша жалған қорытындылар рәсімдеп, соның салдарынан 9,7 млн теңге мемлекеттің қаржысы мақсатсыз жұмсалған.
Бұл прокуратураның АӘК талдау жүргізу барысында анықталған, қаражатты қайтару және кінәлі тұлғаларды тәртіптік жауаптылыққа тарту туралы прокурорлық қадағалау актісі енгізіліп, қазіргі таңда қаралу сатысында.