Қазақстан EuroSkills Herning-2025: Қазақстандық студенттер чемпионатты тарихи жетістікпен аяқтады
Ұлттық құрама алғаш рет бірден 7 "Үздік медальонға" қол жеткізіп, халықаралық аренада ел намысын абыроймен қорғады
Жүлдегерлер қатарында өскемендік Артём Мочинский де бар, деп хабарлайды Устинка LIVE тілшісі.
IX EuroSkills Herning-2025 Еуропалық кәсіби шеберлік чемпионаты — бұл техникалық және кәсіптік білім беру саласындағы ең ірі халықаралық іс-шаралардың бірі. Чемпионат 9–13 қыркүйек аралығында Данияның Хернинг қаласында өтті. Оған 32 елден 597 студент қатысты.
28 студентпен барған Қазақстанның ұлттық құрамасы 25 құзыреттілік бойынша сынға түсті. Байқау қорытындысы бойынша құрама команда 7 "Medallion for Excellence" медальонын жеңіп алды, соның бірі — "Мехатроника" командалық құзыреттілігі бойынша. Бұл марапатты Өскемен жоғары политехникалық колледжінің студенті Артём Мочинский мен ASTANA POLYTECHNIC Жоғары колледжінің студенті Данил Турапин иеленді.
Қатысушылар кәсіби дағдылар мен халықаралық деңгейдегі дайындықты, сондай-ақ жоғары командалық үйлесімділікті көрсете білді.