Қазақстан "Buyers Union" қаржы пирамидасына халық 300 млн теңге салған
Оған 250-ден астам қазақстандық ақша салып, алданып қалған
Қаржылық мониторинг агенттігі кең ауқымды операция жүргізіп, тұтынушылық кооператив ретінде жасырылған "Buyers Union" қаржы пирамидасының қызметін тоқтатты, деп хабарлайды Устинка LIVE тілшісі.
Салымшыларды жылжымайтын мүлік, көлік сатып алуға және Trade in және ReFinance бағдарламаларына қатысып инвестиция салуға үгіттеген. Сонымен қатар, кооператив жеке тұлғалардың қаражатын тартудан дивидендтер алу мүмкіндігімен менеджер болып жұмыс істеуге мүмкіндік берген, - делінген Қаржылық мониторинг агенттігі ақпаратында.
Кооперативке қатысудың міндетті шарттарының бірі - өмірді сақтандыру үшін ай сайын 30 мың теңге төлеу және сатып алынатын мүліктің құнынан 10%-дық жарна төлеу. Бірақ кооператив салымшыларға ақша алғаны туралы ешқандай құжаттарды ұсынбаған, ал салым сомасы тек пайдаланушылардың жеке кабинетінде көрсетілген.
Нәтижесінде пирамидаға 250-ден астам салымшы тартылып, 300 млн теңгеден астам қаражат салған.
Пирамида ұйымдастырушысы екі айға қамауға алынды. Сотқа дейінгі тергеу жалғасуда.