Алаяқтар криптовалюта арқылы аптасына 1000$ тауып отырған

Жыл басынан бері 38 мыңнан астам тіркелмеген SIM-карта тәркіленді, деп хабарлайды Устинка LIVE тілшісі.

Ұлттық ұланның "Бүркіт" арнайы жасағы ІІМ-нің киберқылмысқа қарсы бөлімшелері және "Қазахтелеком" АҚ-мен бірлесіп, 57 SIM-BOX құрылғысын заңсыз пайдаланудың жолын кесті. Арнайы операция барысында түрлі ұялы байланыс операторларына тиесілі 38 мыңнан астам тіркелмеген SIM-карта тәркіленді.

Тек наурыз айының алғашқы онкүндігінде "Бүркіт" арнайы жасағы мен полиция қызметкерлері осындай 4 фактіні анықтады, - деп мәлімдеді ҚР ІІМ Ұлттық ұланы. - Астанада өз  автокөлігінде ел аумағында алаяқтық қоңыраулар шалуға арналған SIM-BOX құрылғысын тасымалдаған шетел азаматы ұсталды. Тінту барысында одан 128 ұяшығы бар екі SIM-BOX, 19 қазақстандық оператордың SIM-картасы және компьютерлік техника тәркіленді. Одан бөлек мобильді байланысқа заңсыз араласу фактісі бойынша елордалық екі тұрғын ұсталды. Олардан екі SIM-BOX және компьютерлік техника табылды. Сол күні Шымкент қаласының тұрғыны да SIM-BOX құрылғыларын заңсыз сақтағаны және пайдаланғаны үшін ұсталды.

Тергеу барысында күдіктілердің криптовалюта арқылы апта сайын шамамен 1 мың АҚШ доллары көлемінде заңсыз пайда тауып отырғаны анықталды. Барлық ұсталғандар қамауға алынды, тергеу жалғасуда.