Қазақстан Х Азия – Тынық мұхиты ойындарына Қазақстаннан 80 спортшы қатысады
Малайзия астанасы Куала-Лумпурда Х Азия - Тынық мұхиты ойындарының ашылу салтанаты өтті
Спорттық жарысқа әлемнің 24 елінен 1300-ге жуық есту қабілеті зақымдалған спортшылар қатысып жатыр, деп хабарлайды Устинка LIVE тілшісі ҚР Спорт және туризм министрлігі ақпаратына сүйеніп.
Олар спорттың 10 түрінен: жеңіл атлетика, таэквондо, дзюдо, еркін және грек-рим күресі, үстел теннисі, бадминтон, шахмат, боулинг және футболдан өзара мықтыны анықтайды.
Бұл жарыста Қазақстан құрамасынан 80 спортшы өнер көрсетеді. Жерлестеріміз 8 спорт түрінен сынға түсуде. Олар жеңіл атлетика, таэквондо, дзюдо, еркін күрес, грек-рим күресі, бадминтон, шахмат және үстел теннисі.
Қазақстан құрамасы Азия – Тынық мұхиты ойындарына 1996 жылдан бері қатысып келеді. Спортшыларымыз Алматы, Қарағанды, Шымкент, Ыстықкөл және Бішкекте оқу-жаттығу жиындарын өткізіп, жарысқа тыңғылықты дайындықпен келді. Енді олардан жоғары нәтиже күтеміз. Спортшыларымыздың табысты өнер көрсетіп, ел намысын лайықты қорғайтынына сенімдімін, - деді Дене мүмкіндіктері шектеулі тұлғаларға арналған спорттық даярлау орталығы спорт басқармасының басшысы Қайратбек Сейтбеков.