Қызметкер қазақ тілін біле ме екен?

Өскемен қаласының мәдениет және тілдерді дамыту бөлімі жыл сайын өткізілуі дәстүрге айналған "Мемлекеттік тіл - мемлекеттік қызметте" атты байқауын ұйымдастырды. Бұған қалалық деңгейдегі әртүрлі мемлекеттік органдардың қызметкерлері команда құрып, өнер мен білім жарыстырды. Атап айтар болсақ, ШҚО Ветеринария басқармасынан "Құлагер", Өскемен қалалық білім беру бөлімінің "Мирас", Өскемен қаласы бойынша мемлекеттік кірістер басқармасынан "Форос", ШҚО бойынша көліктік бақылау инспекциясының "Барыс", Өскемен қаласының ветеринария және ауыл шаруашылық бөлімінің "Тұлпар", Өскемен қаласының мамандандырылған әкімшілік сотының "Сот саңлақтары" командалары қатысты.

 Байқаудың қалалық кезеңіне қатысқан командалар бірінші "Сәлемдесу" кезеңінде өздерін таныстырып, екінші "Жер-судың аты - тарихтың хаты" атты кезеңде қазақ жерінде орналасқан әртүрлі тарихи-мәдени ескерткіштердің тарихы жайында баяндады. Үшінші кезеңде даналық, нақыл сөздердің жалғасын тауып, толықтырды әрі тілдерді дамыту саласын реттейтін нормативтік-құқықтық актілер жайлы сауалдарға жауап берді. Соңғы төртінші кезеңде музыкалық театрландырылған қойылым көрсетіп, "Мәңгілік елдің мәртебелі тілінің" бейнесін жасауға тырысты. Ал қазылар алқасы қатысушыларға үлгі-өнеге айтып, кейбір кем тұстарын жөндеуге шақырды.

- 4 маусым - Мемлекеттік рәміздер күні. Біле білсеңіз, мемлекеттік тіл де елдің рәміздері қатарына жатады. Мемлекеттік тіл, ең алдымен, мемлекеттік органдарда қолданылып, дамуы тиіс. Өйткені мемлекеттік қызметте жүрген жандардың 87%-ы қазақ ұлтының өкілдері. Бүгінгі байқауға қатысуға жас мемлекеттік қызметкерлер көп жиналған екен. Мемлекеттік қызметкерлердің Әдеп кодексінде "мемлекеттік қызметкер өзінің тілі мен дінін, тарихы мен мәдениетін білуі керек" деп көрсетілген. Бұл жастарымызға үлгі болса екен, - деді байқауда бас қазы болған облыстық тілдерді дамыту басқармасының бөлім басшысы Сәуле Қалиғазина. 

Ал байқауды ұйымдастырушы қалалық мәдениет және тілдерді дамыту бөлімі мемлекеттік қызметкерлер арасында байқаулардың аз өткізілетіндігін айтады. 

- Бұл байқаудың негізгі мақсаты - мемлекеттік тілдің қолданылу аясын кеңейту және дамыту, мемлекеттік тілді қолданудың беделін арттыру, мемлекеттік қызметкерлерді ынталандыру. Байқау мемлекеттік қызметкерлердің өздері үшін ұйымдастырылып отыр. Өйткені мемлекеттік қызметкерлердің өмірі қағаз бен қаламға байланғандықтан, бір сәт сергуге шамалары болмай жатады. Ал мұндай байқауларды өткізу арқылы олардың қызметі мен өмірлеріне серпіліс, көңіл-күй сыйлауға болады. Астананың 20 жылдық мерейтойына орай ұйымдастырылып отырған бүгінгі байқаудың жеңімпаздары облыстық байқауда тағы да бақ сынайтын болады, - дейді Өскемен қаласының мәдениет және тілдерді дамыту бөлімі басшысының орынбасары Бақытжан Сабиева. 

Байқауға қатысқан жеті команданың ішінде Өскемен қаласы бойынша мемлекеттік кірістер басқармасының "Форос" командасы ерік-жігерімен, креативті қойылымдарымен көзге түсіп, бірінші орынды қанжығаға байлады. Екінші орынды Өскемен қалалық әкімшілік сотының жас қызметкерлері иеленсе, үшінші орынды Өскемен қалалық білім беру бөлімінің мамандары қанағат тұтты. Жеңімпаздар бағалы сыйлықтармен марапатталды. 

- Байқауда бірінші орын аламыз деп күтпедік. Тосын жағдай болды. Қатты қуанып отырмыз. Дайындалуға уақыт тығыз болды. Бір аптаның көлемінде ғана дайындала алдық. Әрине, егер уақыт болғанда, бұдан да нәтижелі өнер көрсетер едік деп ойлаймын. Енді облыстық кезеңге мықтап дайындаламыз, - дейді "Форос" командасының капитаны Інжу Төлеуханова. 

Енді облыстық кезең мемлекеттік қызметкерлер күніне орай, 21 маусым күні өтпек.