Ақсуат пен Шеңгелдіде жаңа мектеп бой көтермек

Бұл туралы аудан әкімі Асхат Смаилов мәлім етті. Жаңа мектептің құрылыс жұмыстары 2023 жылы басталады деп жоспарлануда.

- Сонымен қатар, Шеңгелді ауылында да 80 орындық мектеп салуға салалық қортынды алынып, экономикалық қортынды алуға жолданды, - дейді Асхат Смаилов.

Оның айтуынша, биыл ауданда 3 мектеп, 1 балабақшаға күрделі жөндеу жұмыстары жүргізіліп жатыр.

- Білім беру ұйымдарын күрделі жөндеу, олардың материалдық-технкиалық базаларын жақсарту мәселелері шешілуде. Жергілікті, облыстық және республикалық бюджеттерден қажетті жағдайларды жасау мақсатында қаражаттар бөлінуде. Атап айтсақ, 2021 жылы "Ауыл - ел бесігі" бағдарламасы аясында 3 мектеп, 1 балабақшаны күрделі және ағымдағы жөндеу жұмыстарына 692,2 млн теңге қаржы қаралып, жұмыстар жүргізілуде, - дейді Асхат Сайдахметұлы.

Айта кетейік, ауданға қарасты мектептерде оқушылардың білім алуы үшін барынша жағдай жасалған.

- Ауданда жалпы білім беретін 35 орта, 4 негізгі орта, 9 бастауыш мектептерінде 8 792 оқушы білім алуда. Бұның сыртында қосымша білім беру ұйымдары: 2 саз мектебі, 2 өнер мектебі, 1 қосымша білім беру орталығы жұмыс істейді. Балаларды мектепке дейінгі тәрбиемен қамту және оқыту бойынша 28 балабақша мен 39 шағын орталық жұмыс істейді. 3-6 жастағы тіркелген 2 571 бала оқу орнымен 100 пайыз қамтылды, - дейді аудан әкімі.