Тарбағатайлықтар жол азабын тартып отыр

Жетіарал ауылына барар жол жүргізушілер үшін нағыз сынақ. Жолдың ұзындығы небары үш жарым шақырым болғанымен, қатынау едәуір уақытты алады. Өйткені қарға адым сайын шұңқыр шығады. Жетіарал ауылына апарар жол неліктен жөнделіп бітпей жатыр?



Осыдан үш жыл бұрын аудан әкімдігіндегілер ауыл тұрғындарына сөз берген. Тұрғындардың айтуынша, Ақжар-Жетіарал, Ақсуат-Ойшілік ауылдары аралығындағы жолдарды жөндеуге 400 млн теңгеге жуық қаржы бөлінген көрінеді. Жетіаралдықтар "Мейлі, миллион бөлінсін, тек жоспарға енгізілген жол бөлігін сиырқұйымшақтандырмай, сапалы етіп жөндеп кетсе түк етпес еді ғой" деп сан соғып келеді.

- Шамамен бес-алты шақырымы ғана асфальт-талды. Мұны облыстық газеттерден бөлек, республикалық БАҚ өкілдері де жариялаған болатын. Мейлі, қаржыны теңдей бөліп пайдаланғанның өзінде кемі 20 шақырымға тасжол төсеу қолдарынан келіп тұр. Көлікпен жүру мүмкін болмай барады, ойдым-шұңқырдан қашып құтылмайсың, - деді Ойшілік ауылының тұрғыны Омархан Найзабекұлы (аты-жөні өзгертілген).

Аудандық ТҮКШ, жолаушы көлігі және автомобиль жолдары бөліміндегілер жолдың қалған бөлігін асфальттау үшін бюджеттік өтінім әзірленіп, облыстық басқармаға жіберілгендігін, сәтін салып, республикалық және облыстық қазынадан тиісті қаржы бөлінсе, аяқталмаған жұмыстың біржақты болатындығын жеткізген еді. Аудан басшылығы сол жоғарыда келтірілген сандарды тізбелеп, алдағы жұмыс барысына бір тоқталып өтті.

- 2019 жылы аудандық маңызы бар Жетіарал ауылына кіреберістің 5,6 шақырымы (69 млн теңге), Ойшілік ауылына кіреберістің 15 шақырым учаскесі облыстық Жолаушы көлігі және автомобиль жолдары басқармасы теңгеріміне алынып, тапсырыс беруші ШҚО Жолаушы көлігі және автомобиль жолдары басқармасы, ал мердігер ұйым "Зайсан құрылыс компаниясы" ЖШС тарапынан орташа жөндеу жұмыстары атқарылды. Қазіргі уақытта орын алған кемшіліктер үш жылдық кепілдік мерзім шеңберінде қалпына келтірілді. Сапасы қанағаттанарлық жағдайда, - деді аудан әкімдігіндегілер.

Ресми мәлімет бойынша, Жетіаралда - 688, Ойшілікте 1218 тұрғын бар. Қазіргі уақытта аудандық маңызы бар Жетіарал ауылына кіреберіс жолдың 5,6 шақырымына, ал Ойшілік елді мекеніне кіре берісті 18,2 шақырымына асфальтбетон жамылғысы төселген. Ал шенеуніктер жолдың қалған бөлігін 2025 жылға дейін салып бітіреміз дейді. 

- Жоспарға сәйкес аталған жолдардың асфальтталмаған бөлігін 2025 жылы аяқтау жоспарланған. Жұмысты тәмәмдау "Зайсан құрылыс компаниясы" мердігер мекемесінің жауапкершілігінде. Мәселені бақылауға алу мақсатында аудан әкімдігі тарапынан бюджеттік өтінімдер мен ұсынымдар құзырлы мемлекеттік органдарға жолданбақ, - деді аудан әкімінің орынбасары Ерсін Ескендіров.

Әкім-қарадан көмек болмаған соң тұрғындар үніміз "еститін үкіметтің" құлағына жетіп қалар деген үмітпен мәселені әлеуметтік желілерде жазып жүр.

- 2019 жылы ауылдың жолын жөндеуге 400 млн теңгеге жуық қаржы бөлінді. Өкінішке қарай, Ақжар мен Жетіаралдың арасындағы жолдың 5-6 шақырымына ғана тасжол төселді. Негізі 12 шақырым. Қалған жері ойдым-ойдым шұңқыр күйінде қалды. "Аспаннан киіз жауса да, қайыршыға ұлтарақтай киіз бұйырмайды" дегендей, бюджеттен ақша бөлінсе де, халық игілігін көріп отырған жоқ. Өздеріңіз көріп тұрғандай жолдың жайы мәз емес, - дейді әлеуметтік желі қолданушысы Ермек Құрманғалитегі.

"Жол азабы - көр азабы" деген мақалдың мәнін тарбағатайлықтар жақсы біледі. Тарбағатай ауданының тұрғындары жол сапасына байланысты осыған дейін де бірнеше рет шағымданған болатын. Тіпті былтыр ғана жаңадан салынған көше жолының кейбір жері 1 метр тереңдікке дейін ойылып кеткені туралы әлеуметтік желіде жазған. Алайда тұрғындар енді қанша шағымданса да жолдардың түгел жөнделуін 2025 жылға дейін күтуіне тура келеді. "Сабыр түбі сары алтын" демекші күтуден басқа амал жоқ сияқты...