Өскемен мен ШҚО ШҚО-да 18 отбасы Наурызды жаңа үйлерінде қарсы алды
Зайсан ауданының Қаратал ауылында 18 отбасыға баспана кілттері табысталды
ШҚО-да президенттің халықты қолжетімді әрі жайлы баспанамен қамтамасыз ету жөніндегі тапсырмаларын іске асыру мақсатында "Бір қабатты Шығыс" бағдарламасы қолға алынған, деп хабарлайды Устинка LIVE тілшісі.
Жаңару мен жаңа бастамалардың символы саналатын ұлыстың ұлы күні қараталдықтар қоныстойларын тойлады.
Бағдарлама аясында округте заманауи үйлер салынып, 18 отбасы баспанамен қамтылды. Оның ішінде 8-і көпбалалы отбасы болса, 10-ы әлеуметтік тұрғыдан осал санатқа жатады, - дейді Қаратал ауылдық округінің әкімі Мереке Сайранов. - Барлық үйлер толықтай тұруға дайын: газ, ауыз су тартылған, кәріз жүйесі жұмыс істейді.
Қоныстой иелерінің бірі – көпбалалы ана Құралай Әлібаева. Оған кең, төрт бөлмелі үйдің кілті табысталды.
Жарқын Наурыз мерекесінде көптен күткен баспанамызға қол жеткіздік. Бұл – отбасымыз үшін үлкен бақыт. Қолдау көрсеткен жандарға алғыс айтамыз. Осындай үйлер мұқтаж отбасыларға көбірек берілсе екен, – деді ол.