Өскемен мен ШҚО Қараталда биыл дәрігерлік амбулатория ашылады
Зайсан ауданында биыл жыл соңына дейін тағы бір медициналық нысан пайдалануға берілсе, келесі жылы екі ауылдың медпунктіне күрделі жөндеу жүргізіледі
Аудан әкімінің айтуынша, дәрігер тапшылығы жоқ, деп хабарлайды Устинка LIVE тілшісі.
Ауданда 1 аудандық аурухана, 9 дәрігерлік амбулатория, 14 медпункт, 1 ФАП және 6 жекеменшік емдеу орталығы қызмет көрсетеді. Кадр тапшылығы жоқ, биыл 3 дәрігер жұмысқа қабылданып, 6 жас маман тұрғын үймен қамтамасыз етілді, - дейді Зайсан ауданы әкімі Аэлита Ахметсәлімкызы. - Аудандық ауруханаға компьютерлік томография орнатылды, Зайсан және көршілес аудандарға қызмет көрсетуде.
Өткен жылы "Ауылда денсаулық сақтауды жаңғырту" ұлттық жобасы аясында үш медициналық нысан салынды. Қаратал ауылындағы дәрігерлік амбулатория құрылысы жыл соңына дейін аяқталады. Ал келесі жылы Жалши және Бақасу ауылдарындағы медпунктер күрделі жөндеуден өтеді. Аудандық аурухананың жұқпалы аурулар бөлімі де биыл жөндеуден өтуде.