Өскемен мен ШҚО Абай облысында балалар үйінің басшылығы 6 млн теңгені жымқырған
Науалы балалар үйінің директоры мен бас есепшісі өздеріне жоғары жалақы мен сыйақы алып отырған
Бұл туралы Абай облысының прокуратурасы мәлімдеді, деп хабарлайды Устинка LIVE тілшісі.
Үржар ауданының прокуратурасы Науалы балалар үйінің әкімшілігі қызметкерлерінің бюджет қаражатын 6 миллион теңгеден астам сомаға ұрлау фактісін анықтады.
Балалар үйінің директоры мен бас бухгалтері өздеріне жоғары жалақы мне сыйақы жазып, сондай-ақ іссапар төлемдерін де алып отырған. Одан өзге, жұмыс істемейтін адамдар үшін де жалақы жазып, қалталарына басқан. Прокуратура штат кестесі мен қазынашылық есептерді салыстыру барысында тиісті жалақы мен нақты төленген жалақы арасында айырмашылықты байқаған, - делінген хабарламада.
Осы факті бойынша прокуратура ҚР Қылмыстық кодекстің 189-бабы 3-бөлігінің 2, 3-тармақтары бойынша қылмыстық іс қозғады. Істі сотқа дейінгі тергеу сыбайлас жемқорлыққа қарсы қызметке тапсырылды.
Осы баптың санкциясы белгілі бір лауазымдарды атқаруға немесе белгілі бір қызметпен айналысуға тыйым сала отырып, 7 жылға дейін бас бостандығынан айыруды қарастырады.