Үржар ауданында спорт кешені ашылды

Ұлттық мереке – Республика күніне және Қабанбай батырдың 330 жылдығына орай Үржар ауданы, Қабанбай ауылында жаңа спорт модулінің салтанатты ашылуы ұйымдастырылды, деп хабарлайды Устинка LIVE тілшісі Үржар ауданы әкімдігіне сілтеме жасап. Спорт кешеніне "Дарабоз" деген атау берілген.

Спорт модульдің үлкен залында Республика күніне және Қаракерей Қабанбай батырдың 330 жылдығына арналған қазақ күресінен "Түйе" және "Өгіз" палуан салмақ дәрежелері бойынша аудандық ашық турнир өтті. Жеңімпаздар аудан әкімі Нұржан Тоқсеитовтің арнайы дипломымен және қаржылай сертификатпен марапатталды, - деп мәлімдеді әкімдіктегілер. - Шараға Қабанбай ауылынан шыққан спортшы жерлестер, елімізге танымал спортшылар және ауыл тұрғындары қатысты.

"Дарабоз" спорт кешені ауыл жастарының спортпен айналысып, болашақ чемпиондарды дайындайтын бірегей нысан болады.

Осы орайда айта кеткен жөн, Үржар ауданында "Асыл мұра" өнер байқауы ұйымдастырылған болатын. Ауданның әр ауылдық округінен іріктеліп шыққан өнерпаздар Республика күні Қабанбай ауылындағы қорытынды кеште өнер көрсетті.