Өскемен мен ШҚО Шәкәрім Құдайбердіұлының туғанына 165 жыл
Бүгін ақын, ұлы ойшыл, аудармашы, философ Шәкәрім Құдайбердіұлының туғанына 165 жыл толды
Осыған орай Семей қаласында ақын рухына тағзым етіліп, Шәкәрім ескерткішіне гүл шоқтары қойылды, деп хабарлайды Устинка LIVE Абай облысы әкімдігі ақпаратына сүйеніп.
Жиынға облыс әкімі Нұрлан Ұранхаев, зиялы қауым өкілдері, қала тұрғындары, жастар, әр саланың өкілдері, Қазақстанның әр өңірінде тұратын ақынның ұрпақтары да келіп қатысты. Мерекелік шараның мақсаты ақынның ұрпақтарын ата қонысымен, Шәкәрім қажының өмірі өткен тарихи орындармен таныстыру, ақынның шығармашылығы, өмір жолын насихаттау.
Шәкәрім бабамыздың өлеңдері – гуманизмнің темірқазығы. Абай елі ұлы бабаларын әрдайым ұлықтап келеді. Шәкәрім Құдайбердіұлының биылғы 165 жылдығы да өнегелі істермен өрнектелуі керек деп ойлаймыз, - деді облыс әкімі Нұрлан Ұранхаев.
Ақынның еңбегі мен шығармашылығын зерттеу, есімін мәңгі сақтау бүгінгі ұрпақтың қолында. Шәкәрім мұрасы - ұрпаққа аманат.
Биыл Шәкәрім атамыздың 165 жылдық мерейтойына арнайы Алматы облысынан бір топ ұрпақтары келдік. Ұлы ақынның шөбересі болып келемін. Шәкәрім атамыздың мерейтойы осындай ауқымды түрде аталып өтіп жатқанына қуаныштымыз. Ұлы тұлғаларымыз зұлмат заманда өмір сүріп, елден кетуге мәжбүр болды. Дегенмен де, қалдырған өшпес мол мұрасы, туындылары халқымыздың игіліне жарап отыр, - деп атап өтті ақынның шөбересі Нұрлан Зиятов.
Мерейтойды өткізу жөнінде облыстық іс-шаралар жоспары бекітілген. Жыл басынан бері 100-ге жуық түрлі шаралар ұйымдастырылды.
Биыл "Абай жолы" кітаптар сериясымен ақынның орыс тіліндегі өлеңдер жинағы шығарылады. Шәкәрім атындағы университеттің бастамасымен ғылыми-тәжірибелік конференция өтеді.