Өскемен мен ШҚО Семей қаласында жаңа мешіт ашылды
Ұлыстың ұлы күніне орай Семей қаласындағы Шығыс кентінде "Әбу-Бәкір Сыддық" мешіті ашылды
Мұнда бір мезгілде 100 адам құлшылығын жасай алады, деп хабарлайды Устинка LIVE тілшісі Семей қаласы әкімінің баспасөз қызметіне сілтеме жасап.
Құлшылық үйінің мұнарасының биіктігі – 15 метр болса, ал күмбезінің диаметрі - 4,5 метр, биіктігі – 2,5 метрді құрайды. Мешітте Құран оқу бөлмесі, ерлер және әйелдерге арналған намаз оқу залдары, дәрісхана бөлмелері бар.
Ұлтымыздың ұлық мерекесі – Наурыз мейрамы мен қасиетті Рамазан айының қарсаңында есігін айқара ашқан мешіт қаламыздың көркіне көрік қосып, дінаралық және ұлтаралық татулықтың ордасына айналады деп сенеміз. Кент жамағатының талай жыл армандаған арманы орындалып, қаламыздағы мешіттер саны 15-ке толықты, - деді облыс әкімінің орынбасары әкімі Шалқар Байбеков.
Айта кетейік, жаңадан бой көтерген Әбу-Бәкір Сыддық мешітінің бас имамы болып Айдын Жүнісбеков тағайындалды.
