Қазақстандағы жалғыз өрт бақылау мұнарасы Семейде сақталған
1927 жылы тұрғызылған бұл мұнара бүгінде қаланың сәулет ескерткіші болып табылады
Ескі шаһардағы ғимараттардың басым көпшілігі ағаштан салынып, бір-біріне жақын орналасқандықтан өрт бақылау мұнарасы бой көтерген, деп хабарлайды Устинка LIVE тілшісі.
Екі қабатты ғимараттың жобасы бойынша сол кезде өрт сөндіру бригадасына арналған негізгі және қосалқы бөлмелер болған, - делінген Абай облысы әкімдігі таратқан ақпаратта. - Өрт сөндіру бекетінің ғимаратында өрт сөндіру көліктері шығатын бес қақпалы көлік тұрағы мен екі мұнара салынған. Оның бірі аймақты қарауға арналған болса, екіншісі өрт сөндіру құбырішектерін кептіруге арналған.
Бұл мұнарада үнемі күзетте бір адам тұрған.
Қатаң талаптарға сәйкес болған адамдар ғана күзет қызметі алынған. Олар ұқыпты, шыдамды болып қана қоймай, қаланың барлық ауданын жақсы білуі, түтіннің түсіне қарап, өрттің ауқымын анықтай білуі тиіс еді, - делінген ақпарат көзінде.
Олар тәуліктің кез келген уақытында, жылдың кез келген күнінде өрт сөндірушілерге өрт апаты туралы ескертіп отырған. 1950 жылдардың басында мұнарада кезекшілік ету тоқтатылды.