Өскемен мен ШҚО Самар ауданының жастары жартастағы жазуларды өшірді
Лайлы су қоймасы маңындағы тастардың бетіне вандалдар жазған 35 жазу бар
Жастар ресурстық орталығының қызметкерлері бейберекет жазылған шимайларды өшіріп, тастарды табиғи қалпына келтірді, деп хабарлайды Устинка LIVE тілшісі.
Самар ауданында "Нағыз патриот" атты экологиялық акция өтті. Жастар ресурстық орталығының мамандары Лайлы су қоймасы маңындағы тастардың бетінен вандалдар қалдырған 35 жазудың бесеуін өшіріп тастады.
Бұл игі істі Өскемен қаласының тұрғыны Вячеслав Орлов бастаған еді. Ол бұған дейін отбасы мүшелерімен бірге тастардың бір бөлігін өз күшімен тазалап, үлгі көрсеткен болатын. Бұл бастама республикалық "Таза Қазақстан" бағдарламасы аясында челлендж түрінде жалғасын тапты. Алдағы уақытта жазуларды толықтай жою үшін тазалау жұмыстары жалғасын табады.
Акцияның мақсаты – ауданның табиғи әрі мәдени мұрасын қорғау, сондай-ақ жастар мен тұрғындарды табиғатқа құрметпен қарауға тәрбиелеу.