Өскемен мен ШҚО ШҚО әкімі жұмыс сапарымен Марқакөл ауданына барды
Жаңа аудандағы бірқатар маңызды нысандарды аралап, ауданды дамытуға байланысты нақты тапсырмалар берді
Ең алдымен Нұрымбет Сақтағанов Орта Теректі су қоймасына барып, көктемгі су тасқынына дайындық жұмыстарын тексерді, деп хабарлайды Устинка LIVE тілшісі.
Кейін аудан орталығындағы сот, прокуратура, полиция, пошта, мәдениет үйі және әкімдік ғимараттарының күрделі жөндеуден кейінгі жағдайымен, аудандық төтенше жағдайлар бөлімінің матералдық техникалық жағдайымен танысты.
Бүгінгі күні өзекті мәселе болған нысан Марқакөл ауылында бірнеше жылдар бойы салынып жатқан спорт кешенінің құрылысын көрді.
Аудан орталығында орналасқан №31 өрт сөндіру бөлімінде жүргізілген жаңғырту жұмыстары кезінде кезекшіліктегі құтқарушылар үшін қолайлы тұрмыстық жағдай жасау және арнайы техникаларға арналған бокстарды кеңейту қажет, - деді облыс әкімі. - Аудан әкімі спорттық-сауықтыру кешеніндегі құрылыс жұмыстарының сапасын бақылауда ұстауы тиіс. Бұл нысан ұзақ уақыт бойы аяқталмаған құрылыс нысандарының қатарында болды. Енді аудан тұрғындары спортпен шұғылданып, бос уақыттарын белсенді өткізетін мүмкіндік болуы үшін аталған нысанды уақытында пайдалануға беру маңызды.
Сапар барысында аудан әкімі Рүстембек Кемешевке және салалық басқарма басшыларына шекара маңындағы аумақты одан әрі дамыту бойынша нақты тапсырмалар берілді. Басты міндет – су тасқыны жағдайын бақылау. Сондай-ақ жолдарды, тұрғын үй-коммуналдық шаруашылық нысандарын салу және жөндеу жобаларын жалғастыру қажет. Аудандағы басым бағыттардың бірі - Марқакөл ауданының туристік әлеуетін дамыту. Бұл бағыттағы жұмыстар жүйелі және дәйекті жүргізіліп, өңірдің табиғи және экономикалық мүмкіндіктері барынша тиімді пайдаланылуы тиіс.