Өскемен мен ШҚО "Тарбағатай ханымы – 2026" арулар байқауы өтті
Халықаралық әйелдер күні мерекесіне орай Тарбағатай ауданында әсемдік пен ақыл-парасатты ұштастырған арулар байқауы ұйымдастырылды
Мерекелік кеш аудан аруларының өнері мен таланты тоғысқан әсерлі шараға айналып, көрермендерге көтеріңкі көңіл күй сыйлады, деп хабарлайды Устинка LIVE тілшісі.
Байқауға қатысқан арулар өздерінің жан-жақтылығын көрсетіп, түрлі кезеңдер бойынша бақ сынады. Бірі әуелете ән шырқаса, бірі қылқаламмен әсем сурет салып, тағы бірі шығармашылық қабілетін паш етті. Қатысушылардың сахна мәдениеті, өнері, тапқырлығы мен білім-білігі әділқазылар алқасы тарапынан бағаланды.
Байқау қорытындысы бойынша:
- III орын – Қарттар үйі мекемесінің қызметкері Дөкенова Мадинаға бұйырды.
- II орын – Аудандық аурухананың қызметкері Аида Даниярқызына табысталды.
- I орын – Абай атындағы орта мектептің қызметкері Ақгүл Аманғазықызына берілді.
Ал байқаудың Бас жүлдесін Айқын Арай иеленді. Жеңімпазға Тарбағатай ауданының әкімі Дархан Шомпайұлының арнайы сыйақысы мен тәж табысталды.
Бұл байқау нәзік жандылардың сұлулығын ғана емес, олардың өнерін, парасатын және қоғамдағы белсенділігін дәріптеген тағылымды шара болды.
