Өскемен мен ШҚО ШҚО-да "Сергек" үшін 238 млн теңге негізсіз төленген
ШҚО әкімдігі "Сергек" жобасын жүзеге асыратын компаниядан қомақты қаржыны қайтарып алды
Бұл туралы Шығыс Қазақстан облысының прокуратурасы мәлімдеді, деп хабарлайды Устинка LIVE тілшісі.
"Сергек" жобасын іске асыру кезінде мемлекеттік-жекешелік әріптестік туралы заңнаманың сақталуын тексеру барысында аталған жоба аясында мемлекет "Көркем-Телеком" ЖШС-мен 7 миллиард теңгеден астам сомаға келісімшарт жасасқаны анықталды.
"Сергек" бағдарламасының әкімшілік құқық бұзушылықтың алдын алуға және жол-көлік оқиғаларының азаюына тигізетін оң әсерін ескеріп, тексеру барысында мемлекеттік қаражатты заңсыз төлеу фактілері анықталды, соның салдарынан жобаның құны негізсіз 238 млн теңгеге өскен, - деп хабарлады облыстық прокуратура. - Прокуратураның енгізілген қадағалау актісі негізінде ШҚО жолаушылар көлігі және автомобиль жолдары Басқармасы негізсіз төленген шығындарды өндіру туралы талап-арыз берді.
Сот шешімімен талап-арыз толық көлемде қанағаттандырылып, апелляциялық саты бірінші сатыдағы сот актісін күшінде қалдырды.
Сот шешіміне сәйкес, "Көркем-Телеком" ЖШС 238 млн теңге мемлекет кірісіне қайтарылды.