Өскемен мен ШҚО Вьетнамдық ірі компания ШҚО-да жүк және жолаушылар тасымалын ұйымдастырмақ
ШҚО әкімі Ермек Көшербаев Вьетнам Республикасының өкілдерімен кездесті
Аймақ басшысы вьетнамдық "Sovico Group" холдингінің директорлар кеңесінің төрағасы Нгуен Тхан Хунгпен кездесті. Холдинг Вьетнамдағы авиация, қаржы, банк, құрылыс және энергетика саласындағы ірі компаниялардың бірі, деп хабарлайды Устинка LIVE тілшісі.
Кездесу өткен жылдың тамыз айында Мемлекет Басшысы Қасым-Жомарт Тоқаевтың Вьетнамға ресми сапары кезінде екі ел жасасқан келісімшарт шеңберінде өтті. Қос ел үкіметі арасындағы сауда-экономикалық ынтымақтастықты жедел дамыту жөніндегі бірлескен жоба жоспары, сондай-ақ үкімет пен туризм саласына инвестиция тарту жөніндегі комитеттер арасындағы келісім сынды бірқатар маңызды құжаттарға қол қойылған.
Қазіргі уақытта" SOVICO Group" "Самұрық-Қазына" АҚ-мен Қазақстанда авиациялық инфрақұрылымды дамыту бойынша келіссөздер жүргізуде.
Келіссөздердің негізгі тақырыбы логистика саласындағы ынтымақтастық. Яғни, Шығыс Қазақстанда жүк және жолаушылар тасымалын ұйымдастыру болды. Тараптар басқа да инвестициялық жобаларға қатысуды талқылады. Өңір басшысы Шығыс Қазақстан ынтымақтастыққа ашық екенін, бұл өз кезегінде екіжақты қарым-қатынастарды дамытуға және нығайтуға күшті серпін беретінін атап өтті, - деп хабарлады ШҚО әкімінің баспасөз қызметі. - Атап айтқанда, Шығыс Қазақстан облысында вьетнамдық әріптестердің авиация саласындағы тәжірибесін қарастыру көзделген. SOVICO-ның жетістіктерінің бірі -Вьетнамдағы авиация саласын трансформациялауда және халықаралық желіні кеңейтуде маңызды рөл атқарған "Vietjet Air" бірінші жеке авиакомпаниясының құрылуы.
Ағымдағы жылдың маусым айында Вьетнам президенті Ван Тхуонгтың Қазақстанға мемлекеттік сапары жоспарланған.